Қазақстанның Қызыл Жарты Ай қоғамы, Болат Өтемұратов Қоры және Fortebank іске асыратын «Көмек картасы» жобасы аясында Солтүстік Қазақстан облысының 861 тұрғыны жалпы сомасы 43 миллион теңгеден астам қаржылай көмек алады. Қардың еруі нәтижесінде Петропавл қаласының маңындағы саяжай массиві су астында қалды.
Қызыл Жарты Ай қоғамының апаттарға ден қою тобы Петропавл қаласында су тасқынынан зардап шеккендердің жағдайы мен мұқтаждықтарына бағалау жүргізді. Отбасының әрбір мүшесі үшін 50 мың теңгесі бар банк карталары 224 отбасына беріледі. Әлеуметтік осал топтар санатындағы азаматтар: жалғызбасты зейнеткерлер, көп балалы аз қамтылған отбасылар, мүгедектігі бар адамдар және су басқан үйлер жалғыз тұрғын үйі болып табылатын басқалар көмек алады.
«Біздің елде адамдар зардап шеккендерге киім-кешек пен азық-түлік беру түріндегі көмекке шақыруларға оңай жауап береді, сондықтан гуманитарлық көмектің жетіспеушілігі жоқ. Біз өз күш-жігерімізді қаржылық қолдау көрсетуге бағыттауды шештік. Бұл жағдайда зардап шеккендер алынған қаражатты қайда бағыттау керектігін таңдай алады. Біздің тәжірибеміз бойынша, көпшілігі үйлер мен жиһаздарды қалпына келтіруден бастауды шешеді», – деді Болат Өтемұратова Қорының директоры Марат Айтмағамбетов.
Петропавлдағы саяжай тұрғындарының су басу аймағында болуы бірінші рет емес. Өткен жылы да олар көмек карталарын алушылардың қатарында болды. «Біз судың қашан келетінін білеміз және алдын ала дайындаламыз – жиһазды, кілемдерді көтеріп, балалар мен қарттарды қаладағы туыстарға жіберуге тырысамыз. Биыл су бірнеше күн тұрды. Өткен жылы жөнделген еден қайтадан ісініп, қабырғалар құлай бастады. Үй ылғалдан желдетіле салысымен, қалпына келтірумен айналысамын», – деп бөлісті жергілікті тұрғын Қайрат Серікбаев.
«Біздің жағдайымыздан бей-жай қалмағанына өте қуаныштымыз. Сіз бірінші жыл емес, тек осында ғана емес, бүкіл Қазақстан бойынша көмек көрсетесіз, сол үшін рахмет», – дейді зардап шеккендер.
«Көмек картасы» бірлескен қайырымдылық жобасы 2018 жылдан бастап табысты іске асырылуда. Осы айдың басында Болат Өтемұратов Қоры мен Қазақстанның Қызыл Жарты Ай қоғамы Қостанай облысы Қарасу ауданының зардап шеккен 200 тұрғынына 10 миллион теңге сомасында көмек көрсетті.
Болат Өтемұратов Қоры мен Қазақстанның Қызыл Жарты Ай қоғамы жергілікті ТЖ органдарымен бірлесіп өңірлердегі ахуалды қадағалап, су тасқыны болуы мүмкін жерлерге шығуға дайын.