2021 жылы Болат Өтемұратов Қоры денсаулық сақтау, білім беру, мәдениет және мұқтаждарды қолдау саласындағы жобаларға 3 миллиард теңге бөлді.
Қордың қамқоршылар кеңесінің төрағасы доктор Алмаз Шарман қор 2021 жылы жұмыс істеген он сегіз жоба туралы айтып берді. Олардың ішінде – «Аутизм. Баршамызға бір әлем», «Жасыл мектеп» және Jas Leader Akademiiasy жобалары, апаттардан зардап шеккендерге көмек көрсету және мұқтаж отбасыларға баспана беру.
«Jas Leader Akademiiasy Шымкент пен Түркістан облысының 50 мектебінің балаларына қарым-қатынас, командада жұмыс істеу және уақытты басқару дағдыларын дамытуға көмектеседі. Бес жыл ішінде жобаға тағы жеті облыстың мектептері қосылады, ал жобаның жалпы бюджеті 2,1 миллиард теңгені құрайды», — деп атап өтті Шарман.
Балаларға арналған «Жасыл мектеп» экологиялық жобасы Алматының 16 мемлекеттік мектебінде басталды, онда қор тамшылатып суару, жарықтандыру және жылытудың ақылды жүйелері бар жылыжайлар салды, ал оқушылар мен мұғалімдер үшін өсімдіктерге қалай күтім жасау керектігі туралы қадамдық нұсқаулықтары бар оқулықтар шығарды.
Қор Арал ауданына құрғақшылық кезінде мал азығы мен ауыл шаруашылығы техникасын сатып алуға 300 миллион теңге бөлді. Аспай суағарын қалпына келтіру маңызды оқиға болды, соның арқасында Кіші Арал теңізіне су ағып жатыр. «Баламекен» жобасы бойынша Арал қаласының 40 көп балалы және мұқтаж отбасыларына жалпы сомасы 300 миллион теңгеге пәтер сатып алынды.
«Асыл Мирас» аутизм орталықтарының желісі кеңеюін жалғастыруда. Жыл соңына дейін Таразда оныншы орталық, ал келесі жылы Қарағандыда орталық ашылады. 2021 жылы орталықтарда интервенция бағдарламасынан 2 152 бала өтті, ал бағдарламаның барлық уақытында – 11 076 бала өтті.
Қазақстанның Қызыл Жарты Ай қоғамымен бірге қор «Көмек картасы» жобасын жалғастыруда. Су тасқынынан зардап шеккендер 53 миллион теңгеге қаржылай көмек алды. Орман өрті кезінде үйлері өртеніп кеткен Риддер қаласындағы 30 отбасы 1 миллион теңгеден алды.
Болат Өтемұратов Қоры Батырхан Шөкенов атындағы қордың жобаларын қолдауды жалғастыруда. Олардың қатарында винилде «Отан Ана» альбомын шығару, композиторларға арналған алғашқы музыкалық резиденцияны өткізу және атаулы шәкіртақылар беру бар. «Біздің ынтымақтастығымыздың шарықтау шегі алдағы жылдың мамыр айында елордада ашуды жоспарлап отырған Батырды еске алуға арналған қоғамдық кеңістікті құру болмақ», — деп қамқоршылар кеңесінің мүшесі, ҚР Халық әртісі Жәния Әубәкірова жоспарлармен бөлісті.
Қор Қорқыт Ата әуежайының жаңа терминалының құрылысын қаржыландырады, ол кейіннен Қызылорда облысы әкімдігінің балансына беріліп, сағатына 300 жолаушыға дейін қызмет көрсете алады.