7 және 8 қарашада Алматыда Болат Өтемұратов Қоры ұйымдастырған «Аутизм. Мүмкіндіктер әлемі» ІІІ халықаралық конференциясы өтті. Спикерлер қатарында балалар аутизмінің мәселелерін, оның пайда болу себептерін, осындай балаларды түзету мен әлеуметтендірудің заманауи тәжірибелерін зерттейтін әлемнің жетекші сарапшылары мен ғалымдары болды. Іс-шараға Қазақстанның барлық өңірлерінен 350 қатысушы келді.
Конференцияны медицина профессоры, қазақ тектес американдық медицина ғалымы Алмаз Шарман ашты: «Өткен жылы біз аутизмнің себептерін, диагностикасын, интервенциясын талқыладық. Биыл біз трендтер мен технологияларға екпін жасадық — бұл біздің қордың басымдығы. Біз әрқашан өзара іс-қимылға ашықпыз және АСА мәселелері бойынша әлемдік трендтермен бөлісуге дайынбыз. 4 жыл ішінде біздің аутизм орталықтарымыз 6000-нан астам баланы қамтыды. Олардың 3500-ге жуығында диагноз расталды».
Іс-шараның жетекші спикерлері: Уоррен Джонс, Эмори университетінің (АҚШ) Өтпелі әлеуметтік неврология орталығының жетекші оқытушысы; Джонатан Панганибан, Калифорния университетінің (АҚШ) Касари зертханасының докторанты; Линдсей Никс, Юта штаты университетінің (АҚШ) ASSERT бағдарламасының үйлестірушісі; Даниель Хайм, Vera аутизм мектебінің (ОАР) сөйлеу терапевті.
Қатысушылар үшін нағыз жаңалық Оңтүстік Африкадағы Edit Microsystems компаниясы АСА бар балаларды түзету үшін арнайы әзірлеген робот-коммуникатор Майло болды. Ол агрессия шабуылдарымен күресуге үйретеді, дұрыс сөз тіркесін табуға көмектеседі, тіпті математиканы үйретеді.
Уоррен Джонс нәресте кезінде аутизм белгілерін анықтауға мүмкіндік беретін бірегей Eye Tracking әдісін ұсынды. Баланың көзқарасының бағыты 3 айлық жаста диагноз қоюдың негізгі көрсеткіші болып табыла екен. Ал 15 айда аутизмді көптеген басқа белгілер арқылы анықтауға және уақтылы араласуды бастауға болады.
Джонатан Панганибан JASPER туралы айтып берді. Бұл бағдарлама сөйлемейтін балаларда сөйлеуді дамытуға бағытталған және таңқаларлық нәтижелер көрсетеді — үш айдан кейін сөйлемейтін балалардың 80 пайыздан астамы сөйлей бастайды. Қазақстанда ол «Асыл Мирас» аутизм орталықтарында сәтті қолданылады.
