Медициналық мекеме Burabike Fest 2019 спорттық-музыкалық фестивалінің ең ірі бенефициары болды.
Болат Өтемұратов Қоры Ақмола облысындағы Есіл аудандық ауруханасына 73 млн теңгеге медициналық құрал-жабдықтарды сыйға тартты, деп хабарлады қордың баспасөз қызметі.
Бір қалаға және 17 ауылдық округке қызмет көрсететін ауруханада реанимобиль болған жоқ, ал медициналық мекемедегі жабдық психикалық және физикалық тұрғыдан ескірген. Қайырымдылық қоры сыйлықтарының бірі – толық жабдықталған Mercedes Benz маркалы флагмандық реанимобиль.
«Жағдайды елестетіп көріңізші: үшінші санаттағы ауыр жағдайы бар босанған әйел жатыр, оны Көкшетау перзентханасына 350 км, тіпті одан әрі – Нұр-Сұлтанның өзіне 415 км-ге апаруға міндеттісіз. Ал арнайы көлік жоқ. Біз жедел жәрдем станциясынан «Газель» немесе көрші аудандардағы әріптестерімізден реанимобиль сұрадық. Әр жолы бүкіл ұжым болып күйзелісті бастан кештік. Енді бізде жаңа, заманауи реанимобиль бар, енді арнайы көлік іздеумен байланысты қауырт жағдайлар болмайды», – дейді Есіл ауруханасының бас дәрігері Дастан Асанұлы.
Аудандық аурухана сонымен қатар хирургия бөліміне анестезия және тыныс алу аппаратын және реанимация бөліміне жаңа туған нәрестелерге арналған реанимация инкубаторын алды.
«Біздің 20 жастан асқан, кеңестік әзірлеудегі ескі анестезия-тыныс алу аппаратымыз өзі әрең жұмыс істеді, оның қосалқы бөлшектерін табу мүмкін емес. Қазір бізде барлық керек-жарақтармен седация және анестезия тереңдігін бақылау жүйесімен толықтырылған еуропалық өндірістегі ең жаңа аппарат бар. Бізде оттегі мен ылғалдылықты реттейтін реанимация бөліміне арналған жаңа жапондық инкубатор бар, соның арқасында біз көптеген шала туылған және ауыр жаңа туған нәрестелерді күтіп, аман алып қаламыз!» – деп бас дәрігер қуанышымен бөлісті.
Дастан Асанұлының өзі Болат Өтемұратов Қорынан көмек сұрады. Қайырымдылық ұйымында Қазақстанның ауруханалары мен перзентханаларын өмірлік маңызды медициналық жабдықтармен жарақтандыру бойынша бірегей жоба бар.
«2013 жылдан бастап біз үш ондаған ауруханаға, перинаталдық орталықтарға және басқа да медициналық мекемелерге жалпы сомасы 1 млрд теңгеге құрал-жабдықтарды сыйға тарттық. Ақмола облысында Есіл ауруханасы – жетінші бенефициар, сонымен қатар біздің жоба тарихындағы ең ірі аурухана», – деді Болат Өтемұратов қайырымдылық қорының директоры Марат Айтмағамбетов.
Қор ауруханаларға арналған жабдықты 2013 жылдан бері өткізіліп келе жатқан Burabike Fest қайырымдылық спорттық-музыкалық фестивалінен түскен ақшаға сатып алады. Ұйымдастырушылар – Болат Өтемұратов Қоры және Rixos Borovoe қонақ үйі. Фестиваль бағдарламасына қайырымдылық аукциондары, веложарыс және веложүріс, шеберлік сабақтары, концерт, пикник, спорттық жарыстар кіреді. Іс-шараға Қазақстанның түкпір-түкпірінен, сондай-ақ Ресей мен Қырғызстаннан спорт және белсенді өмір салтын сүйетіндер жиналады.
Өткен жылы фестивальге қонақтардың төрт мыңнан астам рекордтық саны қатысты. Қайырымдылық алымдарының сомасы рекордтық 300,2 млн теңгені құрады. Олар еліміздің сегіз медициналық мекемесін жабдықтауға жұмсалады.
Биыл Burabike Fest 29 және 30 тамызда өтеді. Болат Өтемұратов Қоры әлеуетті бенефициарлардан медициналық жабдықтарды сатып алуға өтінімдер қабылдайды.