Жеңімпаздар арасында екі жоғары оқу орны мен бес мамандандырылған музыка мектебінің оқушылары бар.
Батырхан Шөкенов атындағы қор мен Болат Өтемұратов Қоры 2020-2021 оқу жылына Батырхан Шөкенов атындағы шәкіртақының иегерлерінің есімдерін жариялады. Олар екі жоғары оқу орнының және бес мамандандырылған музыкалық мектептің оқушылары болды.
Батырхан Шөкенов атындағы қоғамдық қор Болат Өтемұратов Қорының қаржыландыруымен үшінші жыл қатарынан дарынды оқушылар мен студенттер арасында шәкіртақы иегерлерін таңдайды. Осылайша, екі ұйым жергілікті академиялық ортаны дамытып, жас музыканттарға қолдау көрсетуде, деп атап өтті Болат Өтемұратов Қорының баспасөз қызметі.
«Үшінші жыл қатарынан біз Батырхан Шөкенов атындағы қордың жобаларын – музыкалық жоғары оқу орындары мен мектептердің дарынды оқушыларына арналған атаулы шәкіртақыны, Батыр әндерінің қазақ тіліндегі ноталарын шығаруды, оның барлық жеке композициялары бар естелік дискілерді шығаруды, сондай-ақ жезден үрмелі және ұрмалы аспаптарда орындаушылар байқауын қолдаймыз, өкінішке қарай, соңғысынан биылғы жылы пандемияға байланысты бас тартуға тура келді. Әрине, біз оны келесі жылы қайта жалғастырамыз деп үміттенеміз. Жақын арада Батырды еске алуға арналған тағы екі жобаны аяқтаймыз. Нәтижесі ұлы музыканттың жанкүйерлеріне өте ұнайды», – деп сендірді Болат Өтемұратова Қорының директоры Марат Айтмағамбетов.
2020 жылы Алматы, Қарағанды, Нұр-Сұлтан, Павлодар және Өскемен қалаларынан, елордалық өнер университетінен және Алматы консерваториясынан мамандандырылған орта музыка мектептерінің оқушылары шәкіртақы алуға үміткер бола алады. Барлығы 47 өтінім келіп түсті, екінші турға 14 үміткер жіберілді. 2020-2021 жылдары берілетін шәкіртақылардың иегерлері 10 адам болды.
«Біз жас таланттарға қолдау көрсету мүмкіндігіне өте қуаныштымыз – бұл біздің қор жұмысының басым бағыттарының біріне айналды. Біз үшін бұл сабақтастықты сақтау маңызды, өйткені Батыр классикалық музыканы жақсы көретін, жақсы білетін және түсінетін, Алматы консерваториясының түлегі болған. Менің ойымша, оның еңбекқорлығы мен адалдығының мысалы – өмірін музыкамен байланыстырғысы келетіндер үшін тамаша бағдар. 2020 жыл мәдениет және өнер жобалары үшін үлкен соққы болды және біз шәкіртақы иегерлерін марапаттай алғанымыз өте құнды. Біз осы перспективалы балалармен танысып, оларды бөліп көрсетіп, олар туралы айтуға қуаныштымыз», – деді Батырхан Шөкенов атындағы қордың басшысы Наргиз Шөкенова.
Лауреаттар арасында үрмелі аспаптар бөлімінің студенттері мен оқушылары бар:
Құрманғазы атындағы Қазақ ұлттық консерваториясы (Алматы):
- Санжар Қадырбеков (валторна);
- Айғаным Шілдебаева (сыбызғы).
Қазақ ұлттық өнер университеті (Нұр-Сұлтан):
- Инабат Белая (саксофон);
- Рахиля Кумарова (сыбызғы).
Күләш Байсейітова атындағы дарынды балаларға арналған республикалық мамандандырылған орта музыкалық мектеп-интернаты (Алматы):
- Ережан Бақытжанқызы (валторна).
Ахмет Жұбанов атындағы дарынды балаларға арналған республикалық мамандандырылған орта музыкалық мектеп-интернаты (Алматы):
- Данияр Ерман (гобой);
- Мейірхан Тілектесов (кларнет).
Дарынды балаларға арналған Қарағанды музыкалық мектеп-интернаты (Қарағанды):
- Альбина Аяпбек (саксофон).
Дарынды балаларға арналған музыкалық мектеп-интернат (Павлодар):
- Даниил Борисов (валторна).
Қазақ ұлттық өнер университеті жанындағы мамандандырылған мектеп (Нұр-Сұлтан):
- Далия Смағұлова (саксофон).
Студенттер 500 мың теңге көлемінде шәкіртақы алады, мамандандырылған мектеп оқушыларына 250 мың теңге төленеді. Барлық қатысушылар бағдарламалық талаптарға сәйкес музыкалық шығармаларды орындаудың бейнежазбаларын ұсынды, сондай-ақ комиссия мүшелерімен әңгімелесуден өтті.
Алғаш рет Батырхан Шөкенов атындағы гранттар 2018 жылы табысталды. Ол кезде Құрманғазы атындағы консерваторияның бес студенті шәкіртақы иегерлері атанды. 2019 жылы жеті жас музыкант шәкіртақы алды.