Бірінші кезеңде Алматының 16 мектебінде жылыжай орнатылады. Кейін жылыжайлар Нұр-Сұлтан және Шымкент оқу орындарында пайда болады.
Болат Өтемұратов Қоры «Жасыл мектептер» жобасының іске қосылғанын хабарлады.
Жобаның бірінші кезеңі Алматыда басталады, онда Болат Өтемұратов Қоры 16 мемлекеттік мектепте жылыжай орнатады. Алдағы екі жылда бастамаға Нұр-Сұлтан мен Шымкент қосылады, онда тағы 40 жылыжай орнатылады. Бірінші жылыжай Алматы қаласы Түркісіб ауданының №177 мектебінде ашылды.
Жаңа оқу жылында осы бастама шеңберінде Алматының 16 мемлекеттік мектебінің 5-7-сынып оқушылары үшін факультативтік сабақтар өткізіледі. Бағдарламаның үш жылға арналған жалпы бюджеті шамамен 2 миллион долларды құрайды.
«Жасыл» технологиялар мен экологиялық ойлау – бұл біздің күнделікті өміріміздің ажырамас бөлігіне айналатын жаһандық тренд. Сондықтан ерте жастан бастап балаларда экомәдениетті тәрбиелеу және қоршаған ортаға ұқыпты қарауға үйрету маңызды, деп атап өтті қорда.
«Қордың еліміздің жасыл қорын сақтау саласындағы жобаларды іске асыру тәжірибесі бар. 2020 жылы біз Алматының Бас ботаникалық бағын ауқымды қайта құруды жүргіздік. «Жасыл мектептер» жобасына біз өсімдік шаруашылығы, агрономия саласындағы үздік сарапшыларды, сондай-ақ Алматы облысының органикалық ауыл шаруашылығымен айналысатын фермерлерін тартуға тырыстық. Біздің үлкен мұратымыз – болашақта жобаның тұрақтылығын қамтамасыз ету үшін мектеп бағдарламасына жылыжайлардағы сабақтарды енгізу», – деді Болат Өтемұратова Қорының директоры Марат Айтмағамбетов.
Барлық жылыжайлар заманауи тамшылатып суару, жылыту және жарықтандыру жүйелерімен жабдықталған. Өсімдіктерге пайдалы жарық үшін өсімдіктердің биосинтезі мен вегетациясын қолдайтын, олардың өсуін жақсартатын және өнімділігін арттыратын көк және қызыл диодтары бар 60 м фитотаспалар жауап береді. Қыста көкөністер мен жидек дақылдарының қатып қалуын болдырмау үшін инфрақызыл жылытқыштар орнатылып, топыраққа жылыту кабелі төселді. Жылытқыштардың жұмысы ішкі және сыртқы термостаттардың деректеріне байланысты. Бұл жылыжайда қажетті температураны алдын ала орнатуға және автоматты түрде төмендеген кезде жылытқыштарды қосуға мүмкіндік береді.
Жылыту кабелі жылыжайдың периметрі бойынша төселді және топырақтың қатып қалуына жол бермейді, оны қосу және өшіру де автоматты түрде басқарылады. Мұның бәрі қысқы суықтың өсімдіктерге әсерін азайтуға көмектеседі. Жылыту және жарықтандыру жанбайтын кабель арқылы берілетін электр қуатымен жұмыс істейді, барлық кабельдік желілер қорғалған гофрленген құбырға салынады, ал байланыстырушы элементтер тармақталған қораптармен қорғалған.
«Бұл – керемет бастама. Алматы «Жасыл мектептер» бағдарламасы іске қосылатын Қазақстанның алғашқы қаласы болды және қала оқушылары жыл бойы жылыжайда жобаларды жүргізуге мүмкіндік алады. Факультатив және биология сабағы аясындағы практикалық сабақтар пайдалы әрі өзекті болатынына сенімдімін», – деп есептейді Алматы қаласының әкімі Бақытжан Сағынтаев.
Жылыжайларда жұмыс істеу мектеп бағдарламасын практикалық сабақтармен толықтыруға мүмкіндік береді және мұғалімдерге қызықты факультативтік сабақтар өткізуге тамаша мүмкіндік болады. Оқушылар көкөністер, жидектер мен аскөк өсіреді, ал шыққан өнім мектептер командалары арасындағы демонстрациялық жобалар мен конкурстарда қолданылады.