Болат Өтемұратов Қорының қамқоршылық кеңесі сәрсенбі, 5 желтоқсан күні Астанада жұмысты қорытындылап, 2019 жылға жоспарларын белгіледі
Баспасөз конференциясында айтылғандай, қор 2018 жылы берген гранттардың жалпы сомасы 551 млн теңгені құрады. «Аутизм. Баршамызға бір әлем» бағдарламасына 447 млн теңгеден астам қаражат жұмсалды.
– Қор құрылған кезде біз өз қызметімізді негізінен аутизммен күрес мәселелеріне шоғырландырдық. Осы орайда үлкен жетістіктерге қол жеткізілді. Біз бұл проблеманы шешудің жүйелі тәсілін қабылдап, бүгінгі таңда біз бүкіл әлемдік қоғамдастық үшін осы маңызды тақырыппен айналысатын ең танымал қайырымдылық ұйымы болдық деп батыл айта аламыз, — деп атап өтті қордың қамқоршылық кеңесінің төрағасы, белгілі ғалым Алмаз Шарман.
Қазіргі уақытта қордың бағдарламасы аясында алты орталық жұмыс істейді – Астана, Алматы, Қызылорда, Өскемен, Орал және Ақтөбе қалаларында, бұл ретте соңғы екеуі 2018 жылы ашылды. 2015 жылдан бастап орталықтарға 5 мың бала келді, алайда қор еліміздің барлық қалаларынан өтініштер келіп түсетінін және жобаның сұранысы едәуір артқанын атап өтті.
– Біз келесі жылы жаңа орталықтардың ашылуын жалғастыру мүмкіндігін талқылап жатырмыз, – деп қор директоры Марат Айтмағамбетов, Шымкентте осындай орталықтың ашылу мүмкіндігі қарастырылып жатқанын қосты.
Ол сондай-ақ қор жабдықтарды сатып алуға, соңғы әлемдік әдістемелер негізінде мамандар даярлауға қаражат сала отырып, бұл жұмысты жүйелі негізге қоюды өзінің міндеті ретінде айқындайтынын атап өтті.
– Біз ерте скрининг, диагностика мәселелерін шешуге тырысамыз. Осы салада әзірленіп жатқан көптеген әдістерді басқа аурулары бар балаларға қолдануға болады, – деп түсіндірді қор басшысы.
Қамқоршылық кеңестің құрамына кіретін белгілі ақын және дипломат Олжас Сүлейменов аутизм мәселесі бүгінде бүкіл әлем үшін өзекті екенін атап өтті.
– Аутисттер – бұл туылғаннан бастап өмірдің жасыл өрісінде емес, бүйірінде қалатын балалар. Бүгін Астанада 60 сәби дүниеге келеді делік, олардың бірі міндетті түрде аутист болады. Ал егер 600 адам дүниеге келсе, олардың 10-ы және т.с.с. Мұндай трагедиялар көп. Және жалғыз қор — бұл сәбилердің ғана емес, олардың ата-аналарының да тағдырымен айналысатын Өтемұратов қоры(…) Бұл балаға бүкіл өмірін арнауы тиіс(…) Ал қазір қор құрып жатқан орталықтар бұл адамдарға көмектесуде, — деп есептейді Олжас Сүлейменов.
Қамқоршылық кеңестің мүшесі, кәсіпкер Арманжан Байтасов қор мамандарды даярлаумен және елімізде әлемнің түкпір-түкпірінен озық тәжірибені одан әрі таратумен айналысатынына назар аударды
– Шынында да, бұл орталықтар жасыл өрістің шетінде қалған балаларды осы өріске қайтаруға арналған. Аутизмнің әр түрлі дәрежелері бар, әрине, ауыр түрлері кездеседі, бірақ түзетуге болатын түрлері де бар. Олар ақыр соңында тыныш жұмыс істей, мамандық ала алады, олардың арасында өте дарынды адамдар бар. Крест қоюдың қажеті жоқ, тек жұмыс істеу керек, онымен айналысу керек. Қор бұл бағытта көп жұмыс атқарады, — деп атап өтті Байтасов.
«Аутизм. Баршамызға бір әлем» бағдарламасынан басқа, 2018 жылы қор өз қызметін кеңейтті. Атап айтқанда, Алматыда Ботаникалық бақты қайта құру жобасы жүзеге асырылуда (жобаның құны 1 15 млн АҚШ долларына дейін, іске асыру мерзімі – 2019 жылғы желтоқсан). Сондай-ақ, Батырхан Шөкенов атындағы қормен ынтымақтастық туралы келісімге қол қойылды, оның аясында Болат Өтемұратов Қоры 70 млн теңге грант бөлді. Бұл қаражат Құрманғазы атындағы Қазақ ұлттық консерваториясында үрмелі аспаптар сыныбы бойынша оқитын дарынды студенттерді қолдау үшін атаулы шәкіратақы төлеуге бағытталған (2018 жылдың қазан айында 500 мың теңге көлемінде грант алған 5 студент анықталды). Б. Шөкенов атындағы ағаш үрмелі аспаптарда орындаушылардың республикалық конкурсы құрылып, өткізілуде, конкурстың сыйлықақы қоры шамамен 6 млн теңгені құрайды. Бұдан басқа, Мүгедек балалардың ата-аналар қауымдастығымен (АРДИ) жобалар іске асырылуда, оның шеңберінде церебралды сал ауруы бар балаларға арналған қарқынды оңалту және ерте араласу орталығын және церебралды сал ауруы бар балаларды оңалту саласында мамандар даярлау жөніндегі оқу орталығын ашуға 330 млн теңге бөлінді. Аружан Саин «ДОМ» қоғамдық қорымен, Қазақстанның Қызыл Жарты Ай қоғамымен, Нархоз университетімен және басқалармен белсенді ынтымақтастық орнатылуда. 2019 жылдың қаңтарында салауатты өмір салтын заманауи коммуникациялар арқылы ілгерілету үшін бірегей контент жасауға бағытталған «Баламан» атты жаңа жобаны ұсыну жоспарлануда.